श्रीमहालक्ष्मीची आरती
जयदेवी जयदेवी जय महालक्ष्मी ।
वससी व्यापक रूपे तू स्थूलसूक्ष्मी ॥धृ॥
करवीरपुरवासिनी सुरवरमुनिमाता ।
पुरहरवरदायिनी मुरहरप्रियकांता ।
कमलाकरें जठरी जन्मविला धाता ।
सहस्रवदनी भूधर न पुरे गुण गाता ॥१॥
मातुलिंग गदा खेटक रविकिरणीं ।
झळके हाटकवाटी पीयूषरसपाणी ।
माणिकरसना सुरंगवसना मृगनयनी ।
शशिकरवदना राजस मदनाची जननी ॥२॥
तारा शक्ति अगम्या शिवभजकां गौरी ।
सांख्य म्हणती प्रकृती निर्गुण निर्धारी ।
गायत्री निजबीजा निगमागम सारी ।
प्रगटे पद्मावती निजधर्माचारी ॥३॥॥
अमृतभरिते सरिते अघदुरिते वारीं ।
मारी दुर्घट असुरां भव दुस्तर तारीं ।
वारी मायापटल प्रणमत परिवारी ।
हे रूप चिद्रूप तद्रूप दावी निर्धारी ॥४॥
चतुरानने कुत्सित कर्माच्या ओळी ।
लिहिल्या असतील माते माझे निजभाळी ।
पुसोनी चरणातळी पदसुमने क्षाळी ।
मुक्तेश्वर नागर क्षीरसागरबाळी ॥५॥
------------------------------------------------------------------
श्री नवरात्र आरती
अश्विन शुद्ध शुक्लपक्षी अंबा बैसली सिंहासनी हो ।
प्रतिपदेपासूनी घटस्थापना ती करूनि हो
मूलमंत्र जप करूनि भोवते रक्षक ठेवूनि हो ।
ब्रह्मा विष्णु रुद्र आईचे करिती पूजन हो ॥१॥
उदो बोला उदो अंबाबाई माऊलीचा हो ।
उदोकारे गर्जती काय महिमा वर्णू तिचा हो ॥धृ॥
द्वितीयेचे दिवशी मिळती चौसष्ट योगिनी हो ।
सकळामध्ये श्रेष्ठ परशुरामाची जननी हो
कस्तुरी मळवट भाळी शेंदूर भरूनि हो ।
उदोकारे गर्जती सकळ चामुंडा मिळोनी हो ॥२॥
तृतीयेचे दिवशी अंबे शृंगार मांडिला हो ।
मळवट, पातळ-चोळी कंठी हार मुक्ताफळा हो
कंठीची पदके कासे पीतांबर पिवळा हो ।
अष्टभुजा मिरविती अंबे सुंदर दिसे लीला हो ॥३॥
चतुर्थीचे दिवशी विश्वव्यापक जननी हो ।
उपासका पहासी प्रसन्न अंतःकरणी हो
पूर्णकृपे पहासी जगन्माते मनमोहिनी हो ।
भक्तांच्या माऊली सूर ते येती लोटांगणी हो ॥४॥
पंचमीचे दिवशी व्रत ते उपांगललिता हो ।
अर्धपाद्य पूजने तुजला भवानी स्तविती हो
रात्रीचे समयी करिती जागरण हरिकथा हो ।
आनंदे प्रेम ते आले सद्भावे क्रीडता हो ॥५॥
षष्ठीचे दिवशी भक्त आनंद वर्तला हो ।
घेऊनि दिवट्या हस्ती हर्षे गोंधळ घातला हो
कवडी एक अर्पिता देशी हार मुक्ताफळा हो ।
जोगवा मागता प्रसन्न झाली भक्तकुळा हो ॥६॥
सप्तमीचे दिवशी सप्तशृंग गडावरी हो ।
तेथे तू नांदसी भोवती पुष्पे नानापरी हो
जाई-जुई शेवंती पूजा रेखियली बरी हो ।
भक्त संकटी पडता झेलुनी घेसी वरचेवरी हो ॥७॥
अष्टमीचे दिवशी अष्टभुजा नारायणी हो ।
सह्याद्री पर्वती उभी पाहिली जगज्जननी हो
मन माझे मोहिले शरण आलो तुज लागुनी हो ।
स्तनपान देऊनि सुखी केले अंतःकरणी हो ॥८॥
नवमीचे दिवशी नवदिवसांचे पारणे हो ।
सप्तशती जप होम हवने सद्भक्ती करूनि हो
षड्रस अन्ने नैवेद्यासी अर्पियली भोजनी हो ।
आचार्य ब्राह्मणा तृप्त त्वा केले कृपे करूनि हो ॥९॥
दशमीचे दिवशी अंबा निघे सीमोल्लंघनी हो ।
सिंहारूढे दारुण शस्त्रे अंबे त्वा घेऊन हो ।
शुंभ-निशुंभादिक राक्षसा किती मारिसी रणी हो ।
विप्र रामदासा आश्रय दिधला चरणी हो ॥१०॥
------------------------------------------------------------------
श्रीमहालक्ष्मीची आरती - जय देवी विष्णुकांते
जय देवी विष्णुकांते, महालक्ष्मी गं माते ।
आरती ओवाळीन तुज विज्ञानसरिते ॥धृ॥
मर्दिला कोल्हासुर, ख्याती केली की थोर ।
श्रीलक्ष्मी नाम तुझे, दैत्य कांपती फार ॥१॥
धन्य तेथीचे नर, सकळही मुक्त होती ।
तुजला पाहतां सत्वर ॥२॥
रहिवास कोल्हापुरी, पंचगंगेच्या तीरी ।
सुविशाळ सिंहासन, विराजसी तयावरी ॥३॥
मागणे हेचि माये, आता दाखवी पाये ।
उशीर नको लावू, दास तुझा वाट पाहे ॥४॥
------------------------------------------------------------------
सुखसदने शशिवदने अंबे
सुखसदने शशिवदने अंबे मृगनयने ।
गजगमने सुरनमने कोल्हापुरमथने ।
सुरवर वर्षति सुमने करूनियां नमने ।
भयहरणे सुखकरणे सुंदरी शिवरमणे ॥१॥
जय देवी जय देवी वो जय अंबे ।
कोल्हापुराधीस्वामिणि तुज वो जगदंबे ॥धृ॥
मृगमदमिश्रित केशर शोभत ते भाळी ।
कुंचित केश विराजित मुकुटांतून भाळी ।
रत्नजडित सुंदर अंगी कांचोळी ।
चिद्गगनाचा गाभा अंबा वेल्हाळी ॥२॥
कंठी विलसत सगुण मुक्ताफळविशेषे ।
पीतांबर सुंदर कासेसी नेसलेले ।
कटितटी कांची किंकिणी ध्वनी मंजुळ भासे ।
पदकमळ लावण्ये अंबा शोभतसे ॥३॥
झळझळ झळझळ झळकती तांबडे कर्णी ।
तेजा लोपुनि गेले रवि-शशि निज करणीं ।
ब्रह्म हरिहर सकळिक नेणती तव करणी ।
अद्भुत लीला लिहिता न पुरे ही धरणी ॥४॥
अष्टहि भूजा सुंदर शोभतसे शोभे ।
झगझग झगझग झगती लावण्यगाभे ।
म्हगम्हग म्हगम्हग म्हगती समनांची शोभा ।
त्र्यंबक मधुकर होऊनि वर्णितसे अंबा ॥५॥
