गजानन महाराज आरती
जय जय सत्चितस्वरूपा स्वामी गणराया ।
अवतरलासी भूवर जड़ मूढ ताराया ।
जयदेव जयदेव ॥धृ॥
निर्गुण ब्रह्म सनातन अव्यय अविनाशी ।
स्थिरचर व्यापुन उरले जे या जगतासी ।
तें तू तत्त्व खरोखर नि:संशय अससी ।
लीलामात्रे धरिले मानवदेहासी ॥१॥
होऊ न देशी त्याची जाणिव तू कवणा ।
करूनि ‘गणि गण गणात बोते’ या भजना ।
धाता हरिहर गुरूवर तूची सुखसदना ।
जिकडे पाहावे तिकडे तू दिससी नयना ॥२॥
लीला अनंत केल्या बंकटसदनास ।
पेटविले त्या अग्नीवाचुनि चिलमेस ।
क्षणात आणिले जीवन निर्जल वापीस ।
केला ब्रह्मगिरीच्या गर्वाचा नाश ॥३॥
व्याधी वारून केले कैकां संपन्न ।
करविले भक्तालागी विट्ठलदर्शन ।
भवसिंधु हा तरण्या नौका तव चरण ।
स्वामी दासगणूचे मान्य करा कवन ॥४॥
------------------------------------------------------------------
श्रीमत् सद्गुरु स्वामी जय जय गणराया ।
आपण अवतरला जगि जड जिव ताराया ॥धृ॥
ब्रह्म सनातन जे का तें तूं साक्षात।
स्थावरजंगमि भरला तुम्हि ओतप्रोत।
तव लीलेचा लागे कवणा नच अंत।
तुज वानाया नुरले शब्दहि भाषेत ॥१॥
वरिवरि वेडेपण ते धारण जरि केले।
परि सत्सवरुपा आपुल्या भक्तां दाखविले।
निर्जल गर्दाडसी जल ते आणविले।
विहंग नभीचे काननि आज्ञेत वागविले ॥२॥
दांभिक गोसाव्यातें प्रत्यय दावून।
ज्ञानिपणाचा त्याचा हरिला अभिमान।
ओंकरेश्वर क्षेत्री साक्षात् दर्शन।
नर्मदेने भक्तां करवियले रक्षण ॥३॥
अगाध शक्ती ऐशी तव सद्गुरुनाथा ।
दुस्तरशा भवसागरि तरण्या दे हाता।
वारी सदैव अमुची गुरुवर्या चिंता।
दासगणूच्या ठेवा वरद करा माथा ॥४॥
------------------------------------------------------------------
ओवाळीतो स्वामीराया । माथा पदी ठेवूनीया ॥धृ॥
आवरी जगन्मोहिनीला । दावी चिन्मय स्वरूपाला ।
देई सद्बुध्दी मजला । प्रेमे तव यश गाण्याला ।
भक्तांकितां स्वामीराया, चरणी मी शरण ।
करूनी भय हरण, दावी सुख सदन ।
अमित मम दोष त्यागुनीयां । विनवितो दास तुला सदया ॥१॥
जन-पदमुक्ति-पदान्याया । स्थली या अवतरला राया ।
ही जड मुढ मनुज-काया । पदीं तव अर्पियली राया ।
हे दिग्वसन योगीराया, नको मज जनन पुनरपि मरण, येत तुज शरण ।
पुरवी ही आस संतराया । प्रार्थना हीच असे पाया ॥२॥
नेण्या अज्ञ-तमा विलया । अलासी ज्ञान रवी उदया ।
करी तु ज्ञानी जनाराया । निरसुनी मोह - पटल माया ।
गजानन संतराया असशी बळवंत । तसा धीमंत नको बघु अंत ।
विनवितो दास तुम्हा राया । नका त्या दूर करू सदया ॥३॥
------------------------------------------------------------------
आरती सद्गुरू नाथा । अवलीया समर्था ।
आरती ओवाळीतो । मनोभावे मी आता ।
आरती सद्गुरू नाथा ॥धृ॥
दिधले निजभक्ता । भावे इच्छीत फल त्वा, पाजुनि ज्ञानामृता ।
उध्दरिले समर्था । आरती सद्गुरू नाथा ॥१॥
कविजन गुण गाता । थकियले समर्था ।
अघटित ऐसी लिला । मति धजि ही न आता ।
आरती सद्गुरू नाथा ॥२॥
विनंती भगवंता । तारी रामात्मज आता ।
आरती पूर्ण करितो । शरणागत बलवंता।
आरती सद्गुरू नाथा ॥३॥
